కారం తొనలు

Snacks

టీతో సరైన జోడీ ఈ కారం తొనలు. ఏదో ఒకటి తిందాం అని మొదలెడితే కనీసం ఐదుకి తక్కువ తినకుండా ఉండలేరు. కరకరలాడుతూ నోట్లో పడీపడగానే కరిగిపోతూ ఉంటాయి.

నేను వీటిని కారం తొనలు అని పిలుస్తాను. ఇలాంటి రెసిపీ దేశమంతా ఉంది. బెంగాలీలు, ఉత్తరాది వారు కారేలా నిమ్కీ అంటారు. ఇదే రెసిపీ నేను గోవాలో, మహారాష్ట్రాలో చూశాను, కాకపోతే వారు తెలుగు వారికి మల్లే వేపిన వాటిని పంచదార పాకంలో వేసి తీస్తారు. వీటిని తెలుగు వారు పనస తొనలు అంటారు.

కరేలా నిమ్కీలు(కారం తొనలు), పనస తొనలు చూడ్డానికి ఒకేలా ఉండడం వల్ల, అవి చేసే తీరు పిండికి సామగ్రీ అంతా ఒక్కటేలా అనిపిస్తుంది. కానీ కాదు. కరేలా నిమ్కీలకి నెయ్యి ఎక్కువగా వేయాలి, అప్పుడే అవి మరింత గుల్లగా కరకరలాడుతూ ఉంటాయి. పనసతొనలకి అంత నెయ్యి అవసరం పడదు.

రెసిపీ ప్రింట్ చేయడానికి

టిప్స్

నెయ్యి/ డాల్డా:

స్వీట్ హౌస్ వారికి కారా అంత కరకరలాడుతూ రావడానికి కారణం పిండిలో డాల్డా వాడడం వల్లే!!! నేను ఇందులో డాల్డాకి బదులు నెయ్యి వేశాను. నిజానికి నూనె కంటే నెయ్యి వాడడం వల్ల మరింత కరకరలాడుతూ ఉంటాయి తొనలు.

మైదాకి బదులు ఇంకేమి వాడుకోవచ్చు:

ఈ కారం తొనలు మైదాతో చేస్తేనే తేలికగా కరకరలాడుతూ వస్తాయ్. పర్లేదు అనుకుంటే మైదా పిండికి బదులు గోధుమ పిండి ఇంకా 2-3 చెంచాలు బొంబాయ్ రవ్వ వేసి కలుపుకోండి.

పిండి కలిపే తీరు:

పిండి నెయ్యిలో బాగా తడవాలి. అప్పుడే మరింత గుల్లగా వస్తాయ్. ఇంకా నీరు కూడా కొద్దీ కొద్దిగా పోసుకుంటూ గట్టిగా కలుపుకోవాలి. పిండి పూరి పిండి కంటే గట్టిగా ఉండాలి.

తొనలు వత్తె తీరు:

పొడి పొంది ఎక్కువగా చల్లి పలుచని షీట్ మాదిరి వత్తుకోవాలి. వత్తిన షీట్ మీద కూడా పొడి పిండి చల్లుకోవాలి లేదంటే తొనలు అంటుకుపోతాయ్. ఇంకా అంచులు గట్టిగా సీల్ చేసుకోవాలి.
నా కిచెన్ కేబినెట్ చాలా పెద్దది కాబట్టి పిండి అంతా ఒకేసారి పలుచగా వత్తేశాను. మీరు కావాలంటే 3-4 సగాలుగా పిండిని విడదీసి కూడా వత్తుకోవచ్చు.

తొనలు కాల్చే తీరు:

బాగా వేడెక్కిన నూనెలో కొద్దిగా వేసి ముందు కాస్త రంగు మారేదాకా మీడియం ఫ్లేమ్ మీద వేపుకోవాలి. ఆలా రంగు మారాయి అంటే పిండి లోపలి దాగా ఉడికినట్లు. అప్పుడు హై ఫ్లేమ్ మీద ఎర్రగా వేపుకోవాలి.
తొనలు బాగా వేడి నూనెలో వేసి వేపితే పైన రంగొస్తాయ్, లోపల పచ్చిగా ఉంది మెత్తగా అయిపోతాయి చల్లారాక.

తొనల పైన చల్లే కారం:

నేను బెంగాలీ వారి తీరులో కారం, నల్ల ఉప్పు కలిపి వేడి తొనల మీద చల్లాను. మీరు కావాలనుంటే తెలుగు వారి కరివేపాకు కారం కూడా వేడి వేడి తొనల మీద చల్లుకోవచ్చు చాలా రుచిగా ఉంటాయి.